Ċentru Fidi u Ġustizzja
Min aħna?

Iċ-Ċentru huwa ħidma tal-Ġiżwiti Maltin ispirat mill-importanza li l-Knisja u l-Ġiżwiti jagħtu lill-fidi li twassal għall-impenn sabiex titwettaq il-ġustizzja soċjali.

Il-kundizzjoni ewlenija biex issaltan l-imħabba u l-ġustizzja fostna hija r-rispett assolut għad-dinjità tal-bniedem u għad-drittijiet tiegħu. Kull persuna għandha dritt fundamentali għall-ħajja u għal dawk il-ħwejjeġ li jgħinuha tgħix ħajja diċenti - l-ikel u l-kenn, il-familja, il-kapaċità li tesprimi l-idejat tagħha, il-kura, l-edukazzjoni u l-impjieg. Il-Knisja hi f'pożizzjoni privileġġjata biex trawwem rispett ġenwin għad-dinjità ta' kull persuna maħluqa xbieha ta' Alla. Permezz ta' l-analiżi soċjali li ssir fis-seminars, fil-kitba, u fl-attivitajiet oħra ta' riflessjoni taċ-ċentru, infittxu li f'djalogu ma' oħrajn nipproponu policies li jwasslu għal aktar ġustizzja soċjali.

L-għażla tal-fqar ukoll hija s-sinjal tal-wasla tas-Saltna ta' Alla, u din l-għażla hi dimensjoni oħra ewlenija taċ-ċentru, l-aktar permezz tal-komunità tal-Ġiżwiti u l-Istitut Paulo Freire, it-tnejn li huma fiż-Żejtun.

Iċ-ċentru hu in-National Focal Point f'Malta taċ-ċentru Ewropew għall-immonitorjar tar-Razziżmu u l-Ksenofobija (European Monitoring Centre on Racism and Xenophobia, EUMC). L-Unjoni Ewropea hija dejjem aktar konxja tar-razziżmu u l-ksenofobija li jistgħu jeżistu fi ħdanha u l-immonitorjar isir l-aktar permezz ta' National Focal Points f'kull pajjiż, li jkollhom ir-responsabbiltà jagħmlu riċerka fuq din il-problema fil-pajjiż tagħhom. Iċ-ċentru Fidi u Ġustizzja intgħażel għal Malta wara sejħa internazzjonali għal dan ix-xogħol, u din is-sena ikkoordina studju fuq ir-razziżmu fl-oqsma ta' l-edukazzjoni, ix-xogħol, il-housing, u l-leġiżlazzjoni. Għal dan il-għan inbena network ta' organizazzjonijiet u individwi li huma midħla ta' dawn l-oqsma differenti: l-MUT fl-edukazzjoni, il-GWU fil-qasam tax-xogħol, il-Malta Association for Human Rigħts fejn tidħol il-leġiżlazzjoni, flimkien ma' espert fil-qasam tal-housing. Iċ-ċentru huwa mgħejjun ukoll mill-kumpanija Ernst and Young.

Iċ-ċentru Fidi u Ġustizzja huwa wkoll membru tan-Non-Governmental Development Organizations (NGDO) Platform, u qed jipparteċipa fit-twaqqif f'Malta ta' l-European Anti Poverty Network (EAPN).

Iċ-ċentru jitmexxa minn tim ċentrali mgħejjun minn grupp aktar wiesgħa:
Fr Edgar Busuttil, S.J. (Direttur, Istitut Paulo Freire), Ms Clarissa Sammut Scerri, Ms Josephine Vassallo.